”Maður þarf að byrja á að rugga bátnum”

Kristín S. Hjálmtýsdóttir segir frá starfi sínu sem framkvæmdastjóri Rauða Krossins á Íslandi, fjallar um að láta verkin tala og hvernig best er að ná fram breytingum í mannúðarsamtökum.

Kristín S. Hjálmtýsdóttir er menntaður hagfræðingur frá Freiburg í Þýskalandi þar sem hún bjó um alllangt skeið. Eftir langan og farsælan feril sem framkvæmdastjóri millilandaráða Viðskiptaráðs Íslands ákvað hún að venda sínu kvæði í kross og hefur frá upphafi árs 2016 gegnt stöðu framkvæmdastjóra Rauða Krossins á Íslandi.

Kristín hefur alla tíð verið virk í félagsstörfum en þegar börnin fjögur fóru að eldast og félagsstörfum sem þeim tengdist fækkaði, fór Kristín að sinna sjálfboðaliðastarfi á vegum Rauða Krossins, þar sem að hún m.a. eldaði ofan í heimilislausar konur í Konukoti. Eftir að hafa kynnst starfsemi Rauða Krossins jókst áhugi hennar á starfinu sem leiddi til þess að hún varð formaður stjórnar Reykjavíkurdeildar Rauða krossins, og þaðan lá leiðin í framkvæmdarstjórastólinn.

Kristín er ein af þeim sem lætur verkin tala. Hún hefur leitt breytingar hjá Rauða krossinum á Íslandi undanfarin ár og ásamt fleiri forystukonum úr fjölmörgum löndum stofnaði Kristín hóp kvenna innan Rauða Krossins, sem hefur það að markmiði að fjölga konum í stjórnunarstöðum innan samtakanna.

Kristínu hefur verið lýst sem „röggsamri týpu sem kallar ekki allt ömmu sína“. Við getum tekið undir það og hlökkum til að heyra hana segja frá þeim krefjandi verkefnum sem hún hefur tekið sér fyrir hendur.

Sendiráð Íslands býður upp á léttar veitingar að loknum fyrirlestri.

Ath. Það er takmarkaður fjöldi miða á fundinn. Þátttaka er ókeypis, en skráning nauðsynleg á Billetto.dk fyrir 7. september. Hér á eftir munu þær sem skrá sig fá sent formlegt boð í tölvupósti frá Sendiráði Íslands.